تعبت .. اشيروا علي ..

انا امرأة في ال27 من عمري .. متزوجه وعندي 3 اولاد، اكبرهم 5سنوات .. عشت مع زوجي 6 سنوات في سعاده ولله الحمد ولم تمر علينا في حياتنا مشكله بمعني المشكله الا من قليل من الخلافات البسيطه.. بنينا بيت وقبل عن يجهز باشهر قليله فاتحني زوجي بأنه سيتزوج مرة اخرى، حسيت عالمي كله انهار وما عرفت ويش اسوي ، ظليت شهور وانا ابكي وانا كنت حامل، تعبت وايد وما قدرت افاتح اهلي فالموضوع على امل انه يتراجع عن قراره. المشكله اني ما جالي قصرت فحقه او غلطت عليه وكنت اموت فيه واللي اتزوجها لا جمال ولا حسب ولا نسب وبعدين اكتشفت انه كان على علاقه معاها سنه كامله .

فكرت اتركه بس ما بغيت اشرد اطفالي وهم بعدهم صغار من غير اني اتسلفت مبلغ كبير علشان اساعده فبناء البيت وكان واعدني انه يكتب البيت بأسمي وبعد زواجه غير كلامه..

ما عارفه ويش اسوي .. بعد زواجه صارلي انا واولادي اشياء كثيره لدرجه انه اصغر اولادي ظل فالمستشفى بين الحياه والموت وقبلها انا مرضت وتعبت فولادتي وصرت اشوف اشياء فبيتي الجديد وكله احلامي مزعجه وما انام طول الليل وكله احس بضيق وتفكيري كله فالطلاق وبعدين اكتشفنا انه هذي الاشياء كلها سحر بغرض التفريق بينا.. وللحين الوضع على حاله ، وفي احيان احس اني اكره زوجي واني ما طايقتنه واني ابى اطلق وتصير مشاكل بينا واحيانا اقول يمكن هذا نصيبي والله كاتبه لي ولازم ارضى واحتسب الاجر.. انا وايد صبرت عليه وعاملته باحترام طول هذي الفتره بس الحين وايد تغبانه وما قادره اتحمل الفكره وخاصه اني الاحظ تغيرات فتصرفاته وافعاله معي . . احيانا احسه يحبني ويحاول يعوضني عن اللي سواه فيني لدرجة انه يبكي ويقول ندمان وينفذلي اللي اباه واحيانا احسه يكذب علي وبس يحاول يهديني حتى لو بأكاذيب .. وخاصه بعد ما اتراجع في انه يكتب البيت باسمي ..

ما عارفه ويش اسوي؟؟ تعبانه ومتضايقه طول الوقت وبين نارين

يا اني اتركه وابهدل اولادي واتبهدل انا ماليا لاني ادفع اقساط السلفيه او اني اصبر واظل عايشه فضيق ومضايقات فبيتي..

نفسيتي جدا تعبانه لدرجه انه اثر على القلب وصارلي مشاكل في انتظام دقات القلب وفي الصمامات ..

انا اخاطر واضحي بالكثير بصبري بس شايفه انه ما يستحق حبي حقه وصبري عليه ..

ويش اسوي .. تعبت وايد ..

من الموبايل

http://ift.tt/H2nC1e | هذا المحتوى