قصتي مع ألم الجماع

السلام عليكم.. قصتي هذه نشرتها من قبل على صفحة عالفيسبوك وعلى منتدى، وحابة أعرضها عندكم لعلني أفيد غيري ان شاء الله، راح أنسخ نفس نص القصة مثل ما نشرتها من قبل

مشكلتي ممكن تكون غريبة بالنسبة لكثير ناس وما بعرف اذا في حدا منكم سمع عن هيك موضوع من قبل، بس أنا حابة أحكيها حتّى أفيد غيري لاني متأكدة انه في ناس غيري بعانوا منها وما بعرفوا عنها! المهم، أنا من أول ما تزوجت والعلاقة الزوجية بيني وبين زوجي مؤلمة جدا جدا وكل مرة بتكون كإنها أول مرة، بعد بحوالي أربع أشهر زواج شكينا انو يمكن عندي مشكلة أو التهاب رحت فحصت عند طبيبة بالدولة اللي أنا فيها حاليا (كندا) كشفت علي الدكتورة وقالت ما في عندي مشاكل أبدا وانه الوجع سببه نفسي يعني لاني بكون خايفة!! بس اقترحت علينا نستخدم جهاز للتوسيع ومع الوقت بتعوّد وبروح الوجع، جرّبنا اقتراحها لفترة طويلة لكن دون نتائج ملموسة! كان الوجع مستمر وبنفس الحدّة، بعدها حملت وحكينا ممكن بعد الولادة يروح الألم ويصير توسّع عندي بالمنطقة، وفي فترة الحمل كانت الفحوصات الداخلية كتييييير مؤلمة ومعاناة بالنسبة إلي، بعد ما ولدت المشكلة استمرت وما كان الألم يروح، رجعت كشفت عند طبيبة تانية وحكتلي برضو انه سبب الألم نفسي ووصفتلنا كريم ممكن يساعد في العملية! طبعا المشكلة استمرت والكريم ما كان له فايدة... بعدها نزلت على بلدي وبرضو كشفت عند طبيبة ونفس الشي حكتلي انه السبب نفسي كله وبرضووو وصفتلي كريم لتسهيل العملية وما ساعد أبدا أبدا والوجع ما كان عمره يقل!! وكان وقتها مر أربع سنين على زواجي وأنا متأكدة انه السبب مش نفسي وأكيد في سبب غير بسبب الألم، بس ما كنت حابة أروح على كمان طبيبة لانه خايفة تحكيلي السبب نفسي وتزيد علي من همّي.. المهم، قررت أبعت مسج لطبيب نسائية على الانترنت وحكيتله مشكلتي من أولها وحكيتله أنا متأكدة انه السبب مستحيل يكون نفسي! الطبيب هاد حكالي انه مشكلتي هي التهاب وتحسس مدخل الفرج مع تشنج واسمه بالانجليزي

أو Vulvar Vestibulitis

Vulvodynia

بعدها عملت بحث في الانترنت عن الموضوع ولقيت انه في كتييير ناس بعانوا من نفس المشكلة مثلي! وفي كتير ناس بقولوا انه كتير أطباء ما بيعرفوا عن الموضوع أبدا وكتير بفكروه مشكلة نفسية!!! طبعا بعدها دورت على طبيبة بالمنطقة اللي انا فيها تكون على معرفة بالمشكلة اللي عندي والحمد لله لقيت وفحصت عندها وبدأت حاليا العلاج، هاد ال(Vulvar Vestibulitis) بحاولوا بالأول علاجه عن طريق كريمات ودهون وادا ما زبط ممكن يلجؤوا لعملية لازالة الغشاء الي بيسبب هاي المشكلة او حقن بوتوكس، لكن حتى نتائج العملية مش مضمونة مية بالمية ولهاد السبب بتكون العملية آخر خيار عند الطبيب.. أنا حاليا بستعمل كريم اسمه

Estrace

وكتير قرأت في الانترنت عن ناس استخدموه في علاج حالتي وأعطى نتائج جيدة جدا!

على فكرة أنا قرأت عن الحالة اللي عندي فقط في مواقع أجنبية، وكل المواقع العربية اللي قرأت فيها عن المشكلة كانوا يحكوا انه السبب نفسي، بس لقيت فقرة قصيرة جدا في موضوع بالعربي عن المشكلة وهاد هو كلشي قراته!! أنا حبيت أحكي مشكلتي حتى تكون توعية لغيري بعانوا منها وحتى الناس اللي ما بعانوا منها حلو نكون عارفين عن مشكلة زي هيك بتصير مع كتير ناس وما حدا بعرف عنهم لانها مشكلة حساسة وما بتقدر الوحدة تحكي لحدا حتى أهلها، خصوصي انها بتكون مفكرة السبب نفسي..

بحب أحكي لأي وحدة بتعاني من نفس مشكلتي انه لما تروح تفحص تحكي اسم المشكلة للطبيب لانه ممكن ما يكون بعرف عنها ويحوّلها لطبيب تاني مر عليه مثل هيك حالة..!

وان شاء الله لما أحصل على العلاج الكامل راح أخبركم

دعواتكم :)

http://arb3.maktoob.com