السلام عليكم ورحمة الله وبركاتهحبيت استشريكم يا اخواني واخواتي وابيكم تنصحوني في مشكلتي التي ارهقتني ، ربما تكون في نظر البعض بسيطه وتافهه .أنا شاب تزوجت ابنة عمي ، عمري 30 سنه وزوجتي عمرها 20 سنه ، ولي 6 شهور من زواجنا ، انا من الرياض وهي من جدة ، ويعلم الله عز وجل كم احب زوجتي ، وأعلم انها تحبني ، لكن مشكلتي بارك الله فيكم هي حساسيتها الزايده ، وزعلها من اصغر الاشياء واتفهها ، والموضوع هذا يتكرر بحياتي كثير لدرجة اني بديت اتضايق ، ينقلب البيت فوق تحت فقط بسبب زعلها من شيء تافه ، الايام الاولى من حياتنا قلت لساتنا عرسان جدد وتصير مثل هذي المشاكل دايماً ، يعني قلت عادي تدلع وعروسه جديده ، المهم في كل مره تزعل بسبب او بدون سبب من شيء تافه او صغير ، مني او من غيري ، يكون النظام اني انا اجي اراضيها واتودد لها واجلس يومين او اكثر اراضيها الين ترضى ، وهكذا في كل مره تزعل ، تزعل انا اجي اراضيها حتى لو كانت زعلانه من صديقتها ، انا الي اراضي ، الحقيقه يا اخوان اعرف ان هذا الاسلوب غلط ، وانا والله من باب خوفي من الله ومحبتي لها ما احبها تكون زعلانه ، حبيت يكون بيتنا كله سعاده وفررح ، انا جربت النكد لمدة طويلة ، حيث ان امي توفت الله يرحمها وعمري 8 سنوات ، ولدي شقيقه واحده تصغرني ب 3 سنوات ، وابي الله يحفظه تزوج مرأه ثانيه بحجة انه يرغب بتربيتنا والمحافظه علينا لكن ربي بلانا بإمرأه لاتخاف الله ، وورتنا من الويل والعذاب مالله به عليم ، وحسبنا الله نعم الوكيل ، ماحب اخرج عن الموضوع لكن الي حبيت اوضحه اني اكره شيء عندي الزعل والنكد، وما احب امر في حياتي مع زوجتي بأي زعل او مشكله نفس ما مريت فيه سابقاً ، احب حياتي كلها تكون حلوه ، واتشارك معها السعاده والفرح طول العمر ، والله العظيم يا اخواني اني اول ما ارجع من الدوام للبيت قبل ما افتح باب بيتي ارمي كل همومي وماشاكلي وراي ، وابتسم وادخل ، احاول قد ما اقدر اني اسعدها واخليها فرحانه طول الوقت ، والله العظيم اني البيلها طلباتها وكل ما تتمناه ، اي شيء بس احس انه يسعدها ويبسطها اسويه ، ماني مقصر لا في البيت ولا في الحياه والمعاشره ولا حتى في نفسي ومظهري ولا حتى في اي شيء اخر ان شاء الله .تسلفت وتبهذلت عشان اجمع فلوس مهر وايجار شقه واثاث من الى عشان مايكون شيء قاصر عليها .كل الي اطلبه منها انها تبادلني نفس الشعور ونفس التعامل ، لكن الي اشوفها غير كذا ، انا ما اكذب عليكم ماهي مقصره معي لا من اكل ولا من نظافة ولا من اهتمام بنفسها ، لكن ماهو بنفس الطريقه الي اقدمها لها ، ما اكذب عليكم جلست معها في اكثر من مره وكلمتها ، اذا مقصر في شيء او مضايقك من شيء علميني ويكون جوابها النفي ، كلمتها ان حساسيتها الزايده سبب مشاكلنا ، وما احب اشوفك تزعلين يمشي الحال يومين ثلاثه وبعدين ترجع الى نفس الزعل الي ماله داعي ، ألحين انا وياها متزاعلين من يومين ، والله مدري من ايش زعلانه ، لكن لا كلام وسلام ولا حتى ننام من بعض ولا نجلس من بعض ، كلمتها وقلتها ليش زعلانه واذا انا الي مزعلك حقك علي ، كله ولا زعلك ، قامت من عندي وهي تبكي وخلتني ،وانا متأكد انه شيء صغير ومكبرته ، قبل كم اسبوع وديتها عند احد القرايب وبناء على طلبها ، كان كل شي تمام وحطيتها وهي مستانسه ومبسوطه وكل شي حلو وودعتها ومن الشغلات الرومنسيه هذي ، ورحت عند ابوي لزيارته وانتظارتها الين تخلص ، اتفاجأ بعد ساعتين ترسل لي رساله ، اش رايك انام عندهم ، دقيت عليها وقلت لها جايك الحين ، ركبت السياره وهي مولعه وماده بوزها شبر ، قلت لها خير ياعمري وش فيك ، عسى ماشر ، احد ضايقك احد قالك شي ، ماكلمتني ، وجلست ارتجاها يومين عشان تقولي ، وبعدين رحمت حالي وقالت لي ، ليش مااتصلت علي وقلت امرك ولا لا يوم كنت عندهم ، قلت لها الحين هذا الي مزعلك ، قالت ايه ، انت ماصدقت تحطني عندهم ، انت ماتهتم فيني ، وانت وانت ، كل الي سويته اني كبرت راسي وجيت وحبيت على راسها وقلت لها اسف ، وان شاء الله ما تتكرر ، ليس ضعف مني ، وليس لانه مقصر بشيء في حياتي او ناقصني شي يخليني اتعامل معها بهذا الذل الا لني اتقي الله فيها واحبها ، وقلت دام هذا الشي مزعلها وهو شيء ماله داعي ، سهل اني اكبر راسي واراضيها ونفتك من ذا الموضوع ، واشياء كثيره وكثيره نفس الفكره ، هي تزعل انا اراضي .طولت بكلامي عليكم ، لكن حبيت اوضح الصوره بشكل يمكنكم من مساعدتي .انا ما افكر اخليها ، وشايل هذي الفكره من راسي ، كل الي ابيه منكم تنصحوني وش اسوي معها ، هلى تصرفي معها صحيح ولا خطاء ، او استخدم اسلوب ثاني او اش اسوي بارك الله فيكماذا كانت الشغله لانها عروسه جديده وتصير مع الكل انا مستعد اصبر العمر كله لكن اشوفها تتغير ، او اذا تعاملي معها خطأ ارجوكم نبهوني وبدون مجامله .الله يحفظكم ويرعاكم ، ويديم عليكم الصحه والعافيه والسعادةاللهم امين يارب العالمين.
arb3.maktoob.com/vb/index.php | هذا المحتوى
ليست هناك تعليقات:
إرسال تعليق