انا ومشاكل امي وابوي

أمي وابوي عنيدين وكل يوم يومين لازم يتخاصمون ويجرحون في بعض كلام

باقي لي سنة واتخرج من الجامعة واستنى اللحظة اللي اقدم فيها ع بعثة واخرج وما ارجع

اخوي بأمريكا وقبل مايروح كان دايما يقول الله يطلعني من بينكم ع خير





أحس بديت أحقد عليهم أو اني أحبهم واكره اللي يسونه ماعرف متلخبطة هم يعاملوني زين بس

معاملتهم لبعض جدا سيئة مافي احترام وبس يتحدون بعض وروسهم يابسة

وهالشي من واحنا صعار من وكنت وانا احاول اتدخل بينهم واحاول احل مشاكلهم

و صرت بس انفجر فيهم واصارخ ع اني كنت جدا هادية بس طفشوني

اكره اني اعاملهم كذا واكره نفسي لما اقولهم متى افتك منكم وما ابيكم في حياتي

والحين احاول امسك نفسي ومااتدخل بس لازم تجي لحظة واصارخ عليهم

ويقهروني لما يزعلون مني ..

جماعتنا دايم اسمعهم يقولون فلان وفلانة (يقصدون امي وابوي ) باقي يتضاربون؟

واتضايق لما اشوف الناس كلها تدري بمشاكلهم





لما كان عمري 19 انخطبت وبقي كم يوم واعقد فشلوني من الولد وفصخت بسبب مشاكلهم

وكل شخص تقدملي يتخاصمون عليه وابطل انا

واي ناس يجون لعمتي يقولون لها نبغى رفا بنت اخوك ترفض لانها تدري نهاية السالفة

اخوها وزوجته بيتخاصمون وهي تتفشل زي كل مرة

صرت اكره الزواج واخاف اوافق ع احد مع انه نفسي اطلع من البيت





وقبل كم شهر ولد خالتي كلم جدتي وقلها ابي اتزوج رفا قبل سنتين قالت نفس

الكلام ولد خالتك يبيك واحاول اتجنب الموضوع لاني كل مرة اوافق ع احد

أتهرب بس من اللي انا فيه ويمكن تكون نهاية السالفة مثل قبل





فيني احباط مو طبيعي ماعرف اذا مكبرة الموضوع او لا

انا من النوع اللي ما اتكلم عن وش يصير في بيتنا حتى لاقرب صديقاتي

وكتبتلكم يمكن يكون عنكم كلام يخليني اعيد النظر في بعض الاشياء ؟

ويمكن ذا الشي يصير عند كل الناس !؟

http://ift.tt/H2nC1e | هذا المحتوى